A poxa de Acruga en Seoane do Courel bate o récord da tempada cunha media de 4.100 euros por xovenca
A poxa de xovencas organizada este domingo pola Acruga en Seoane do Courel volveu situarse entre as máis destacadas do calendario gandeiro galego ao acadar o prezo medio máis alto da tempada. As tres reses adxudicadas lograron unha cotización media de 4.100 euros, superando os 3.833 euros rexistrados na poxa celebrada en marzo en Boimorto.
A xornada confirmou o interese que esperta este tipo de exemplares entre os profesionais do sector. A primeira xovenca da mañá acadou os 4.700 euros tras unha intensa poxa e foi adquirida por un gandeiro de Pedrafita, que tamén mercou o segundo animal por 4.500 euros. O terceiro exemplar cambiou de mans por 3.300 euros e rematou noutra explotación de Pedrafita do Cebreiro.
Os tres animais saíran a poxa cun prezo inicial de 2.900 euros, unha cifra que se incrementou notablemente durante as licitacións. Desde a organización destacan que este comportamento reflicte tanto a calidade das xovencas como a crecente demanda de gando selecto de raza rubia galega entre as explotacións da provincia.
As reses procedían de gandarías de Manzaneda, Cervantes e Castro de Rei e foran recriadas na Granja Gayoso Castro, centro no que Acruga e a Deputación de Lugo colaboran para ofrecer exemplares de alto valor xenético a criadores e novos produtores que apostan por esta raza.
Ademais de mellorar os rexistros da pasada campaña —cando a media se situou nos 3.733 euros— a poxa reuniu numerosos interesados. En total repartíronse 18 tarxetas de posibles compradores de distintos municipios lucenses, ás que se sumou unha gandeira chegada desde Manzaneda.
As xovencas, preñadas de entre dous e tres meses, confirmaron así o bo momento que atravesa o mercado da raza rubia galega e o peso que mantén Seoane do Courel como unha das prazas de referencia para este tipo de operacións.