A Pobra de Trives celebrará a noite de San Xoán cunha festa en Santa Leonor
A Pobra de Trives acollerá o vindeiro San Xoán unha celebración na zona de Santa Leonor que combinará tradición, música e actividades culturais arredor dunha das noites máis simbólicas do ano.
A programación incluirá música e animación durante toda a noite, así como propostas de carácter tradicional como maquillaxe ancestral, recollida de flores de San Xoán, bailes e un círculo de intencións, ademais de diferentes rituais asociados a esta data festiva.
Entre as actividades previstas tamén haberá unha sardiñada popular, con viño da Ribeira Sacra e outros produtos gastronómicos, nun ambiente pensado para a convivencia e a participación veciñal. O momento central da celebración será a fogueira de San Xoán, prevista para as 00:00 horas.
A organización establece unha entrada de 10 euros, que dá acceso a todas as actividades programadas ao longo da xornada. As inscricións permanecerán abertas ata o 19 de xuño e contan con prazas limitadas por aforo.
A proposta preséntase como unha oportunidade para celebrar a chegada do verán nun entorno natural, recuperando costumes tradicionais e fomentando a participación comunitaria.
