A Nocturna do Xeoparque regresa este sábado a Ribas de Sil
Ribas de Sil acollerá o vindeiro sábado, 3 de outubro, unha nova edición de ‘A Nocturna do Xeoparque’, unha proba deportiva organizada pola Quiroga Trail Challenge que percorrerá diferentes sendeiros do Xeoparque Mundial da UNESCO Montañas do Courel, con saída e desenvolvemento en San Clodio e paso por enclaves como A Moa.
O evento combina a vertente deportiva coa promoción do territorio e pretende consolidarse como unha cita con capacidade para atraer participantes e acompañantes de distintos puntos da península. A organización sinala tamén o seu potencial para contribuír á actividade económica das comarcas de Quiroga e Ribas de Sil, especialmente nos sectores da hostalería, a restauración e o comercio local.
Unha das novidades ou eixos destacados desta edición será o impulso ao deporte base a través das ‘Carreiras Picariñ@s’, dirixidas a menores de ata 11 anos. Estas probas serán gratuítas e non competitivas e buscan fomentar desde a infancia os hábitos de vida saudables, o respecto polo medio natural e o contacto coa natureza mediante a práctica deportiva.
A Quiroga Trail Challenge será a responsable da organización e da seguridade e loxística da proba, avalada pola súa experiencia na celebración doutras competicións como o Trail do Castelo ou o Trail do Lor.
A modalidade principal contará cun percorrido de 16 quilómetros e un desnivel positivo de 1.150 metros. Para participar será obrigatorio dispoñer de determinado material, entre o que se inclúen frontal e manta térmica. Esta proba forma parte do circuíto da Súperliga Galega de Trail e CxM.
O trazado levará os participantes por espazos de interese paisaxístico e xeolóxico do Xeoparque, nun percorrido nocturno pola contorna de Ribas de Sil que permitirá combinar a práctica deportiva coa visita ao patrimonio natural da zona.
A organización destaca tamén a repercusión económica da cita, pola chegada de deportistas e acompañantes procedentes de diferentes puntos da península. Segundo sinala, esta afluencia beneficia a hostalería e restauración e o comercio local, ademais de favorecer a promoción de produtos artesanais e vitivinícolas e contribuír á desestacionalización turística do interior de Galicia.
‘A Nocturna do Xeoparque’ contará con catro modalidades: un trail longo de 16 quilómetros, un trail curto de 10 quilómetros, unha andaina de 8 quilómetros e as carreiras infantís.