A Nocturna do Xeoparque Montañas do Courel reúne 250 participantes na súa primeira edición
A primeira edición da Nocturna do Xeoparque Montañas do Courel reuniu este sábado arredor de 250 participantes entre as diferentes probas deportivas e a andaina non competitiva de oito quilómetros. A xornada combinou deporte e montaña nun percorrido nocturno polo territorio do Xeoparque e incluíu tamén carreiras infantís, cunha ampla participación de nenos e familias.
A competición contou con dúas probas principais, de 16 e 10 quilómetros, ademais da andaina de oito quilómetros. As persoas participantes afrontaron percorridos de montaña durante a noite, coa dificultade engadida da falta de luz e un trazado que esixiu resistencia, orientación e destreza.
Na proba de 16 quilómetros, denominada A Nocturna, Javier Janeiro Cerdeira, como independente, foi o primeiro clasificado na categoría masculina cun tempo de 1:49:57. José Manuel Vázquez Pose, do Toxos e Birras, ocupou a segunda posición con 1:53:04, mentres que Diego Lorenzo Muñoz, do C.D. 21 Leguas, completou o podio cun rexistro de 2:01:12.
Na categoría feminina, Elena Castro Rumbo, tamén independente, conseguiu a vitoria cun tempo de 2:15:55. Diana Domínguez Pereira, do Trail Running Nigrán, foi segunda con 2:18:17 e Aida Rodríguez Rivera, independente, rematou terceira tras parar o cronómetro en 2:28:52.
A organización destacou tamén a participación feminina no conxunto do evento, que alcanzou o 42% das inscricións. Esta presenza sumouse á participación nas carreiras infantís e na andaina, completando unha xornada deportiva con propostas para diferentes idades e modalidades.
Na proba de 10 quilómetros, A Carreiriña, Marta Rivera Vázquez conseguiu a vitoria absoluta, mentres que José Antonio Orozco Vázquez foi o vencedor masculino.
A primeira edición da Nocturna do Xeoparque pechouse así cunha participación de arredor de 250 persoas entre as diferentes actividades e cunha programación que combinou competición, sendeirismo e deporte de base no contorno natural das Montañas do Courel.