A entrega de diplomas da 3ª quincena pecha os Campamentos Deportivos de Verán de Monforte
O alcalde de Monforte, José Tomé Roca, xunto co concelleiro de Deportes, José Manuel Mougán, fixo entrega este venres, 14 de agosto, dos diplomas acreditativos aos 67 nenos e nenas que participaron na terceira quincena do Programa Deportivo de Verán do Concello de Monforte. O acto tivo lugar no Pavillón Polideportivo de A Pinguela, coa participación do técnico municipal de Deportes, Óscar Rodríguez.
Con esta entrega de diplomas péchase unha nova edición dos Campamentos Deportivos de Verán, que ao longo do período estival ofreceu actividades lúdicas e deportivas a un total de 245 nenos e nenas de Monforte, co obxectivo de facilitar a conciliación persoal, laboral e familiar durante as vacacións escolares.
O alcalde, José Tomé, destacou o importante esforzo que fai o Concello para organizar este programa, cuxa finalidade é facilitar a conciliación familiar ao tempo que os nenos e nenas de Monforte desfrutan das súas vacacións practicando as actividades que máis lles gustan.
No seu conxunto, o Programa Deportivo de Verán contou ata a data cunha participación de 381 nenos e nenas: 245 nas tres quincenas dos campamentos deportivos, 105 no Campus de Fútbol Cidade de Monforte-RC Celta de Vigo e 31 nas tres quendas dos Cursos de Tenis.
O calendario do Programa Deportivo de Verán mantén activos os cursos de natación na Piscina Climatizada Municipal de A Pinguela, cunha nova quenda do 16 ao 31 de agosto.