A Deputación de Ourense organiza a sexta edición da Ribeira Sacra Cycling Road, con máis de 300 ciclistas
O Parador de Santo Estevo foi o escenario escollido para presentar a sexta edición da Ribeira Sacra Cycling Road, unha marcha cicloturista sen carácter competitivo organizada a través do Inorde, dependente da Deputación de Ourense, que terá lugar o domingo 20 de setembro. A saída está prevista ás 09.30 horas desde a localidade de Luíntra, no Concello de Nogueira de Ramuín.
Á presentación acudiron representantes institucionais e organizativos vinculados ao evento, entre eles responsables do Inorde, do Concello de Nogueira de Ramuín, do Concello de Parada de Sil, da Axencia de Turismo de Galicia, a dirección técnica da proba e un representante da Garda Civil de Ourense.
Esta edición confirma a boa marcha da convocatoria, que medrou un 25 % en número de participantes respecto ao ano pasado. A cifra de inscritos supera xa os 300 ciclistas, chegados desde un total de 18 provincias españolas, entre as que figuran Madrid, Barcelona, Asturias, León, Sevilla ou Valencia. Este dato pon de manifesto o interese que a Ribeira Sacra esperta fóra das fronteiras galegas.
Os participantes poderán escoller entre dous percorridos pensados para distintos niveis de esixencia física. Por unha banda, a modalidade de gran fondo, a máis dura, con 110 quilómetros de percorrido e un desnivel positivo acumulado próximo aos 2.400 metros. Por outra banda, a opción de medio ou mini fondo, con 90 quilómetros de trazado e un desnivel positivo aproximado de 1.800 metros.
Máis alá da súa vertente deportiva, a cita converteuse nunha ferramenta para dar a coñecer a comarca de Ourense, contribuíndo a promocionar o seu patrimonio natural e cultural, a súa gastronomía e a súa oferta enoturística entre quen se achega a participar ou acompañar aos corredores.