A Deputación de Ourense destina máis de 980.000 euros a subvencións para concellos e entidades da provincia
A Deputación de Ourense celebrou unha nova sesión da súa Xunta de Goberno na que se trataron 34 asuntos, entre eles a aprobación de 29 subvencións que suman un total de 980.410,45 euros destinados a concellos e entidades da provincia.
Durante a comparecencia posterior á reunión, o presidente da institución provincial, Luis Menor, explicou que estas axudas responden a demandas concretas formuladas polos municipios e serven de apoio ao traballo de entidades que prestan servizos e dinamizan distintos ámbitos da provincia.
O responsable provincial lembrou que, desde que o goberno retomou as súas sesións o pasado 17 de agosto, o organismo mobilizou xa 8.651.687,69 euros en axudas baseadas na cooperación. Segundo indicou, a utilidade dunha administración próxima mídese pola súa capacidade de converter os recursos públicos en solucións reais, como pode ser o arranxo dunha estrada, a mellora dunha rede de saneamento ou o reforzo da actividade dunha entidade.
848.410,45 euros para 16 concellos
O groso das axudas, 848.410,45 euros repartidos en 24 subvencións, destínase a 16 concellos da provincia para actuacións moi diversas. Entre as partidas máis destacadas figuran os 70.000 euros para Manzaneda dedicados ao arranxo de camiños en varios núcleos, ademais doutros 43.500 euros para o mantemento da vía entre Raigada e O Bao e 8.542,60 euros para instalar mesas de pícnic no parque infantil da localidade.
O municipio de Os Blancos recibirá 50.000 euros para amortizar débeda, mentres que O Pereiro de Aguiar contará con 48.000 euros para mellorar os viais da Granxa, Vilarchao e Cortiñas, aos que se suman 5.993,13 euros para o mantemento do campo de fútbol.
Outras localidades beneficiadas son Boborás, con 20.000 euros para rehabilitar a mina e o lavadoiro de Sande; A Bola, que recibirá 45.000 euros para o bacheado de varios núcleos e outros 45.000 euros para mellorar o saneamento en Rubiás e Sorga; e Celanova, con 34.986,85 euros para a reforma de parques e xardíns.
O listado inclúe tamén 39.000 euros para acondicionar a rúa Mata en Petín; 48.000 euros para Cortegada, destinados a reconstruír o muro de acceso ao balneario; e 58.000 euros para Cualedro, cos que o concello poderá adquirir materiais e manter as súas vías municipais.
Entrimo recibirá 40.000 euros para pavimentar o camiño entre Alén e A Aldea, na Pereira, e 11.000 euros adicionais para mellorar un camiño en Guxinde. Pola súa banda, Gomesende contará con 60.000 euros para arranxar os accesos a Viñal, Feardos e Sobrado.
O municipio de Riós é o que recibe un maior número de partidas diferenciadas: 9.450 euros para o saneamento, 13.783,97 euros vinculados ao Plan Marco 2026-2027, 8.799,99 euros para luminarias e 2.613,55 euros para equipamentos de protección, maquinaria e ferramentas.
Completan a listaxe Leiro, con 46.000 euros para a rúa Cruceiro do Olmo; Sarreaus, con 45.000 euros para arranxar camiños e mellorar a seguridade viaria; Verea, con 47.350,06 euros para o bacheado e pavimentado de varias pistas; e Vilariño de Conso, con 48.390,30 euros para unha actuación de mellora no núcleo de San Cristovo.
Luis Menor puxo en valor o coñecemento que teñen os concellos sobre as necesidades reais da súa veciñanza e destacou que a Deputación se mantén ao seu carón para que poidan levar a cabo melloras en servizos e espazos públicos, tamén nos municipios con menos recursos.
132.000 euros para cinco entidades
O segundo bloque de axudas, cun importe de 132.000 euros, repártese entre cinco entidades de distintos ámbitos. A Asociación de Familiares de Enfermos de Alzheimer de Ourense, AFAOR, recibirá 30.000 euros para ampliar as súas instalacións durante a anualidade 2026.
A Asociación Provincial de Empresarios da Construción de Ourense contará con 60.000 euros para desenvolver un proxecto de emprego dirixido a persoas maiores de 30 anos.
No eido deportivo, a Federación Galega de Atletismo recibirá 20.000 euros para organizar o meeting internacional e o campionato de España de federacións autonómicas de 2026, mentres que a Federación Española de Ximnasia contará con 15.000 euros para o campionato nacional de trampolín e estética de 2025.
Por último, a Asociación Cultural 40 Anos do Descenso do Miño recibirá 7.000 euros para financiar exposicións e actividades relacionadas co descenso do río Miño.
A sesión incluíu tamén modificacións do Plan provincial de cooperación que afectan a actuacións en Piñor, Xinzo de Limia e Manzaneda, ademais dun cambio no acordo de subvención vinculado á primeira fase de ampliación e mellora do Museo da Limia, en Vilar de Santos.