A Deputación de Ourense coordina a distribución de 511 equipos de extinción de incendios
A Deputación de Ourense está a coordinar a entrega de máis de medio milleiro de equipos de extinción de incendios forestais que foron achegados por ABANCA e a súa Obra Social Afundación aos municipios rurais da provincia.
O reparto realizouse nun acto celebrado no Parque de Maquinaria da Deputación de Ourense, no que participaron o presidente provincial, Luis Menor; o director de ABANCA en Ourense, José María Jardón; o coordinador de RSC e Sostibilidade de Afundación, José Manuel Mourelo; e o director de Banca Agro de ABANCA, Jesús Combarro, xunto con representantes dos concellos beneficiarios que acudiron a recoller os materiais.
En total distribúense 511 kits, deseñados para facilitar actuacións rápidas nos primeiros momentos dun incendio, especialmente en zonas rurais antes da chegada dos servizos profesionais de extinción. Cada un destes equipos inclúe unha mochila ríxida cun sistema de lanza de dobre funcionamento que permite a saída continuada de auga, ademais dun batelume pensado para apagar o lume directamente sobre o terreo.
A asignación dos lotes a cada municipio fíxose tendo en conta a súa superficie, co obxectivo de adaptar a dotación ás necesidades reais de cada concello e garantir unha distribución proporcional. Segundo os datos achegados, esta iniciativa abrangue unha área superior aos 7.187 quilómetros cadrados e beneficia a unha poboación rural que supera os 199.800 habitantes.
Durante o acto, Luis Menor puxo en valor a colaboración das entidades implicadas e afirmou que representa “a responsabilidade e implicación absoluta destas entidades co noso territorio”. Tamén incidiu na necesidade de cooperación colectiva ante este tipo de emerxencias, ao sinalar que os incendios constitúen “unha ameaza colectiva que esixe que aglutinemos esforzos desde todos os ámbitos da sociedade”.
O presidente da Deputación comprometeuse a continuar impulsando accións de loita contra o lume e de protección do rural, que cualificou como “prioridade absoluta”, e sinalou que, aínda non sendo unha competencia directa da institución, considera “unha obriga e unha responsabilidade facer da nosa provincia o lugar máis seguro posible”.
A institución provincial lembrou ademais que dispón de brigadas propias, persoal especializado e maquinaria específica, e que é a única deputación galega que mantén un convenio coa Xunta para a dotación de maquinaria destinada a tarefas de prevención de incendios nos concellos.
Pola súa banda, o director territorial de ABANCA en Ourense, José María Jardón, destacou que "o compromiso de ABANCA co rural ourensán é absoluto. Quen traballamos pegados ao territorio sabemos que o monte é vida e economía para os nosos municipios, e con esta achega queremos que a primeira liña de defensa, que son os concellos, conte desde hoxe mesmo con ferramentas que permitan reaccionar con rapidez antes da chegada dos servizos de extinción".
O coordinador de RSC e Sostibilidade de Afundación, José Manuel Mourelo, afirmou que "esta entrega demostra como a cooperación institucional multiplica o impacto da acción social. Desde Afundación canalizamos o esforzo deste plan no ámbito da prevención dotando aos municipios de materiais homologados e de alta calidade, reforzando a seguridade das persoas e do noso patrimonio natural".