A Carreira Popular "Entre pazos e carballos" regresará a Taboada o 26 de setembro
A Asociación Cultural O Carballo de Taboada organiza un ano máis a Carreira Popular de Taboada "Entre pazos e carballos", unha cita deportiva integrada no XII Circuíto Miño Ulla de Carreiras Populares que se celebrará o vindeiro sábado 26 de setembro.
A competición contará con tres percorridos adaptados ás distintas idades e niveis de participación. A proba absoluta, de 10 quilómetros, dará comezo ás 18 horas, a mesma hora na que se disputará tamén a carreira de 5 quilómetros. Pola súa banda, as probas destinadas ás categorías escolares arrancarán ás 19:30 horas e incluirán distancias comprendidas entre os 100 e os 1.500 metros.
A organización entregará a todos os participantes un agasallo ecolóxico e ofrecerá, ademais, unha degustación gratuíta de produtos da zona ao remate das probas, co obxectivo de promover tamén os produtos locais.
As persoas interesadas en participar deberán formalizar a súa inscrición antes do 24 de setembro a través da páxina web de Championchip Norte. Para obter máis información, a organización habilitou tamén o correo electrónico ac.ocarballo@gmail.com.