A banda Brassica Rapa dará un concerto gratuíto en Monforte con motivo do 25 aniversario do Conservatorio Municipal
A programación polo 25 aniversario do Conservatorio Municipal de Música Mestre Ibáñez de Monforte continúa esta semana cun novo acto musical. A Casa da Cultura Poeta Lois Pereiro acollerá mañá xoves, ás 20.00 horas, un concerto da formación galega Brassica Rapa, con entrada libre ata completar aforo.
A actuación enmárcase no calendario de actividades organizadas polo Concello para conmemorar o cuarto de século de historia do conservatorio, un centro creado en 1999 e consolidado como referencia na formación musical na cidade.
Brassica Rapa é unha “brass band” integrada exclusivamente por mulleres e nacida a finais de 2017. A agrupación destaca pola combinación de instrumentos de vento metal e percusión, ofrecendo un espectáculo de carácter enérxico e festivo. O seu repertorio abrangue estilos variados, desde temas de pop e jazz ata música tradicional galega e bandas sonoras, incorporando tamén elementos vocais e de multipercusión.
O concerto chega tras outras actividades xa celebradas dentro do programa conmemorativo, como unha mesa redonda sobre a influencia da música na saúde e na formación das persoas, e un concerto de mestres do propio conservatorio.
O Conservatorio Municipal de Música ‘Mestre Ibáñez’ conta na actualidade con sete especialidades —Piano, Percusión, Clarinete, Saxofón, Violín, Vento metal e Guitarra— e un cadro docente formado por dez profesores e profesoras. Ao longo destes 25 anos, máis de 800 estudantes pasaron polas súas aulas, cifra que supera os 2.000 se se inclúe tamén a Escola Municipal de Música.
Os actos de aniversario culminarán o 6 de xuño cunha cerimonia central na Casa da Cultura Lois Pereiro, na que se reunirán representantes da comunidade educativa e do Concello. O evento incluirá actuacións de exalumnado que actualmente desenvolve a súa carreira profesional na música, como o barítono Lucas López López e a violinista Aldara Otero Fernández, acompañados ao piano polo profesor Azazel Fernández Prado, ademais da entrega de recoñecementos conmemorativos.