A Andaina Solidaria da Peroxa congrega preto de 200 persoas na súa novena edición
A localidade da Peroxa acolleu este domingo a novena edición da súa Andaina Solidaria, unha cita que reuniu preto de 200 persoas e que, segundo a organización, superou as expectativas de participación previstas para esta xornada.
A actividade comezou ás 09.30 horas na Praza do Concello, punto de saída dos dous itinerarios propostos, de 7 e 15,5 quilómetros respectivamente, que percorreron diferentes lugares e paraxes do municipio. Aínda que a mañá arrancou con frío, as condicións meteorolóxicas melloraron ao longo da xornada, o que favoreceu o desenvolvemento da andaina.
Nesta ocasión, a entidade beneficiaria foi ALCER Ourense, a Asociación para a Loita Contra as Enfermidades Renais, á que se destinan cinco euros de cada inscrición como apoio ao seu labor asistencial e social.
Ademais do percorrido, a xornada incluíu varios puntos de avituallamento distribuídos polo traxecto, degustación de pinchos e un sorteo de agasallos entre as persoas participantes, nun ambiente descrito como de convivencia e compañeirismo.
Desde a organización municipal valorouse positivamente a acollida desta edición e agradeceuse a implicación tanto das persoas participantes como das entidades colaboradoras que fixeron posible a celebración da andaina, na que, segundo destacaron, "a solidariedade foi a gran protagonista".