O Concello da Pobra do Brollón pon en valor o éxito da última edición do Concurso de Tapas da Guimaralia
O XV Concurso de Tapas da Guimaralia que tivo lugar do 29 de novembro ao 5 de decembro na Pobra do Brollón, rematou con cerca de 2.000 pinchos vendidos entre os seis locais participantes.
As tapas gañadoras establécense por votación popular. Recolléronse 205 tarxetas de votación válidas, é dicir, seladas polos seis establecementos. As tapas máis votadas foron: en primeiro lugar, a tapa “’Nadie a leva’ con patacas do Agro” do Primeiro de Maio; en segundo lugar, ‘Solombo no souto dos Gandarós’, da Salanova; e a terceira gañadora, ‘Solombo en salsa de queixo azul con verduras e redución de Val do Frade’ do Avenida.
Entre todas as persoas participantes na votación, sortearase unha noite con circuíto termal no Hotel Iberik Augas Santas de Ferreira de Pantón. O sorteo realizarase na Casa da Cultura ‘Olga Novo’ dentro dos actos dos Reis de 2025, así como a entrega do premio do sorteo e dos diplomas acreditativos aos establecementos gañadores.