Chantada acolle hoxe na Biblioteca Pública un obradoiro de igualdade
Unha das actividades impulsadas polo Centro de Información ás Mulleres e a Concellería de Igualdade do Concello de Chantada para este 25 de novembro, terá lugar hoxe ás 12.00 horas na Biblioteca Pública Municipal.
Baixo o nome de A min gústame o rosa, hoxe ás 12.00 horas terá lugar en Chantada un obradoiro de igualdade para o que non é preciso inscrición previa.
Nenos e nenas de entre 4 e 9 anos poderán participar nesta iniciativa que ten coma obxectivo recoñecer e desmontar os estereotipos de xénero e ofrecer referentes alternativos.
A través da lectura dramatizada dun conto adaptado á idade das cativas e cativos abordaranse conceptos coma a desigualdade, a discriminación e a construción social das diferenzas entre homes e mulleres.
Do mesmo xeito, vénse de coñecer que a Biblioteca Pública Municipal deste municipio xa ten dispoñibles para a lectura por parte de tódolos interesados e interesadas, os Premios Xerais 2022 dirixidos a público infantil, xuvenil e adulto respectivamente.
Estes libros son: Unha nova dimensión de Anxo Iglesias (Premio Merlín de Literatura Infantil 2022), Cicuta para dous de Rocío Leira (XIV Premio Jules Verne de Literatura Xuvenil) e A culpa de María Solar (XXXIX Premio Xerais de Novela).
