Alberta Lorenzo presenta 'A arquitectura bieita do Condado de Pallares: Os mosteiros femininos desaparecidos' en Taboada
Taboada acolle a presentación do libro 'A arquitectura bieita do Condado de Pallares: Os mosteiros femininos desaparecidos' de Alberta Lorenzo Aspres, premiada na XVI edición do Certame de Investigación Condado de Pallares, convocado pola Asociación de Amigos do Mosteiro de Ferreira de Pallares coa colaboración da Vicepresidencia da Deputación de Lugo.
O acto, que contará coa presenza da autora, celebrarase ás 20.00 horas no Cuartel Vello, lugar ao que poderán acudir todas as persoas interesadas en coñecer ao autor e a súa obra.
Alberta Lorenzo Aspres, doutora en Arquitectura e directora da plataforma virtual Proxecto ARGA: Arquitectura rehabilitadas de Galicia, analiza neste estudo as características arquitectónicas dos desaparecidos mosteiros bieitos femininos do antigo Condado de Pallares: os de San Xoán da Cova e Santao Estevo de Chouzán, en Carballedo; o de Santa María de Xián, en Taboada, o de Santa María de Pesqueiras, en Chantada, o de San Salvador de Portomarín e o de Santa María de Mosteiro, en Guntín.
No limiar da publicación, a investigadora pon en relevo a carencia de estudos monográficos sobre os mosteiros beneditinos femininos, fronte a abundancia de investigacións sobre os masculinos, e sinala a vontade de achega, con esta publicación, “o seu gran de area contra esta invisibilidade de xénero, ademais de colaborar na eliminación das numerosas lagoas que inundan o coñecemento do noso rico patrimonio.