A ANPA do CPI Poeta Uxío Novoneyra denuncia o risco que supón para o alumnado o peche do tramo entre Ferreiría Vella e Seoane
A ANPA do CPI Poeta Uxío Novoneyra esixe á Xunta de Galicia un transporte 4x4 que faga de lanzadeira entre Seoane e o CPI, para minimizar os riscos do desvío habilitado para o transporte escolar.
O pasado 4 de agosto, a Xunta anunciaba o peche temporal do tramo de 2 quilómetros entre Ferreiría Vella e Seoane, obrigando ao transporte escolar a desviarse para chegar ao CPI Poeta Uxío Novoneyra. Un desvío que, segundo denuncian desde a ANPA, é “nefasto para os alumnos”. . As previsións iniciais eran que o tramo abriría ao tráfico o pasado 11 de outubro, pero ese mesmo día a Xunta anunciaba a prórroga dos traballos, aprazando a súa apertura ata o vindeiro 11 de novembro.
Por iso, lembran que o pasado 16 de setembro solicitaron un transporte 4x4 para garantir a seguridade do alumnado. Denuncian que “o silencio da Xunta ante esta petición obrigounos un mes máis tarde a solicitar axuda institucional ao Concello de Folgoso do Courel, solicitando a súa intermediación coa Consellería para conseguir ese transporte”, pero que a día 28 de outubro non recibiron ningunha resposta por parte do Concello.