Bóveda celebra o Día da Biblioteca este outubro
Bóveda celebra o Día da Biblioteca, no centro sociocultural este outubro con diferentes actos repartidos en varios días. Desta maneira, a primeira xornada, que se levará a cabo o mércores 20 de outubro, acollerá o obradoiro infantil sobre textos de Olga Novo para celebrar o Día das Escritoras. O horario no que se celebrará será de 16.30 a 18.30 horas.
O venres 22, polo seu lado, de 12 a 14 horas, estará o contacontos Lúa Triangular. Nada é imposible!, de Jara Ortiz.
Finalmente, para rematar coas xornadas, o domingo 24 de outubro, ás 18.30 horas, Xoán Curiel realizará a actuación Cantando as nosas letras. O artista fonsagradino vén de sacar un novo disco o pasado mes de marzo, Treides Comigo, un traballo no que puxo música a varias cantigas medievais de trobadores galegos.
Unhas xornadas lúdicas e amenas, nas que se levarán a cabo todas as medidas sanitarias correspondentes e que entran dentro do programa Ler conta moito.
