Xabier Díaz & Adufeiras de Salitre actúan no día de mañá en Monforte
O Concello de Monforte de Lemos recibe no día de mañá, venres 24 de setembro, o concerto As catedrais silenciadas de Xabier Díaz & Adufeiras de Salitre no Edificio Multiusos. A cita celebrarase ás 20 horas e cun aforo reducido debido á covid19.
A entrada é gratuíta ata completar a capacidade do edificio seguindo a normativa sanitaria no momento da actuación. A entrega de invitacións realizarase dende ás 18 horas e a entrada o salón de actos comezará ás 19:30 horas.
As Catedrais Silenciadas é o terceiro álbum do músico Xabier Díaz xunto coas Adufeiras de Salitre, quizais a obra que mellor reflicte a esencia do seu encontro e probablemente a que explora os límites deste formato con máis profundidade.
O título é un berro de alerta ante o progresivo despoboamento do rural e a perda identitaria que isto implica: a desaparición da cultura que temos e que fundamenta a nosa diferenza no mundo.
