Piden que se repare a estrada da rúa Deputación en Ribas de Sil
O PP de Ribas de Sil súmase aos veciños e veciñas en urxir ao goberno local a reparar con seguridade a estrada da rúa Deputación nun tramo que presenta afundimentos e varios buratos que supoñen un risco para os usuarios e que ademais coincide cun paso inferior dedicado á canalización de augas.
O presidente da xestora do PP local, Jose Rodríguez, advirte da existencia de "danos no interior dese túnel". O popular sinala tamén que "xa pasou algo similar fai dous anos e nese momento cubriuse o túnel con formigón, pero agora volve pasar demostrando que non era a solución".
Por iso, esixe "unha reparación que garanta a seguridade na estrada" e traslada a súa preocupación pola situación da zona tendo en conta que se trata dunha estrada moi transitada. De feito, explica que "cando pecha o paso a nivel, os vehículos pasan por esa rúa que conecta con San Román".
