O trío Caldo actuará maña venres en A Pobra do Brollón
Esta fin de semana volve cargada de actividade en terras guímaras con diversos eventos, tralaa suspensión provocada polos lumes.
O venres pasado estaba previsto un concerto do grupo Caldo que tivo que ser adiado debido ao incendio forestal. Finalmente, terá lugar maña venres 29 a partir das 20:30 horas no bar-restaurante 'A Mesa dos Catro Cabaleiros', na aldea do Busto.
A aldea, situada na parroquia de Saa, é unha das zonas do municipio que foi afectada polos lumes. En resposta ao devastador incendio, este primeiro evento municipal despois da vaga de lumes será precedido dun "acto veciñal en defensa do noso monte".
“Trátase tamén dunha oportunidade de agradecer de xeito público aos veciños e veciñas que axudaron na situación extrema da semana pasada tanto na primeira liña de lumes como na loxística colaborativa” comenta Xosé Lois Maceda, alcalde da Pobra do Brollón.
Despois do acto comezará o concerto de Caldo, trío que que achega a música tradicional galega a contextos sonoros contemporáneos a través da experimentación cos propios instrumentos. Gañadores a mellor proxecto de música folk nos Premios Martín Códax da Música de 2020, actualmente atópanse nun verán repleto de actuacións en escenarios de prestixio como os Atardeceres do Gaiás na Cidade da Cultura.
O restaurante 'A Mesa dos Catro Cabaleiros' ofrecerá opción de cea en forma de racións. A previsión é que o concerto remate en foliada, polo que dende a organización exhortan aos asistentes a que suban instrumentos e ganas de baile.
O sábado 30 continúa a actividade cultural, neste caso no espazo do conxunto de adegas medievais de Vilachá, que acollerán un dos eventos do 17º Festival Ribeira Sacra, con apoio do Concello da Pobra do Brollón e da asociación veciñal de Vilachá de Salvadur.
O espazo abrirá a partir das 13:00 horas co evento principal, a actuación de 'Los Mejillones Tigre', grupo de Xaén que inspira alegría e baile a través dunha mestura de cumbia, garage, boogaloo e psicodelia.
Despois do concerto, que terá lugar na zona do fondo das adegas, a música trasládase ao campo da festa onde haberá sesión DJ e postos de comida incluíndo pulpeira. Ademais, haberá adegas abertas e sorpresas ao longo do evento.
Vilachá acollerá outra celebración ese mesmo día, neste caso na aldea de Trasmonte xa que o Furancho O Currio pecha as súas portas debido á fin de tempada. Organizarán a partir das 20:00 horas unha festa en forma de foliada para despedirse dos clientes e amigos.
E xa por último, o domingo 31, a actividade trasladarase á parroquia de Fornelas onde se está a escavar no xacemento da Muradella. O equipo dirixido polo arqueólogo Rodrigo Paulos Bravo celebrará xunto aos veciños unha xornada de portas abertas que inclúe unha visita ao xacemento, charlas con membros do equipo e actividades festivas. O evento enmárcase no Bicentenario do Concello de Cereixa promovido polo arqueólogo e investigador Xurxo Ayán.
Unha fin de semana repleta de actividades que como recalca o alcalde, “é sintomática do noso xeito de facer, descentralizando as actividades nas distintas parroquias e apoiando aos establecementos locais”.