O músico Óscar Ibáñez actuará en Quiroga este domingo
O músico Óscar Ibáñez dará un concerto no Auditorio Municipal de Quiroga este domingo, 19 de xaneiro, co que o artista celebra o 20 aniversario de traxectoria artística coa súa banda de directo “Óscar Ibañez & Tribo”.
Ibáñez presenta no municipio lucense o seu espectáculo “Tribal XX”, onde combina novas composicións con algúns dos temas máis representativos da súa discografía. Esta proposta ofrece unha viaxe sonora cargada de orixinalidade, imaxinación e creatividade, destacando especialmente a esencia celta nas súas melodías.
Óscar Ibáñez, recoñecido gaiteiro e flautista, sobresae pola súa capacidade para fusionar as raíces musicais cunha estética atlántica contemporánea. O seu traballo, baseado na investigación e a innovación, dá lugar a unha sonoridade única que leva o seu inconfundible selo persoal.
Nesta proposta, de gran intensidade e dinamismo, as melodías tradicionais de Galicia, a Península e Europa enriquecen con matices modernos e interpretacións virtuosísticas. Estas creacións, elaboradas con unha linguaxe actual, constrúense sobre unha sólida base rítmica onde os ritmos galegos se mesturan con influencias de xéneros europeos e americanos.
A banda Óscar Ibáñez & Tribo está integrada por músicos con ampla e recoñecida experiencia, que teñen colaborado con destacados artistas e grupos de música folk. Entre eles están Suso Iglesias (acordeón), Paula Gómez (violín), Xosé Liz (bouzouki), Paco Dicenta (baixo), Leandro Deltell (batería e percusión), Teresa Gómez (zanfona), Carla Villanueva (xilófono) e seis gaiteiros da Banda de Gaitas Suevia de Porto do Son.
Con esta formación, o grupo ten realizado máis de 250 concertos por toda a Península Ibérica, Alemaña, Bretaña e Italia, sendo parte dos festivais folk internacionais máis prestixiosos.
O concerto, con entrada de balde está organizado polo Concello de Quiroga e patrocinado pola Xunta de Galicia.