O Concello de Quiroga reforza a comunicación coa veciñanza cunha nova canle de WhatsApp
O Concello de Quiroga conta cun novo servizo de información a través da aplicación WhatsApp. Trátase dun “Canal de difusión” no que enviará a toda a veciñanza, que así o desexe, notificación de acontecementos e actividades. Os canles de WhatsApp están na opción “novidades”, que é onde se agrupan tanto as canles como os estados da aplicación.
Este servizo complementa a información que xa se mantén a través das redes sociais (Facebook e Instagram) pero coa intención de ser máis inmediata. A finalidade, segundo matiza o equipo de Goberno, é poder avisar a veciñanza en tempo real dun corte dunha rúa ou unha avaría na rede de auga, por exemplo, e que os destinatarios o reciban inmediatamente. Aínda que a través desta canle tamén se informará de actividades programadas dende os distintos departamentos municipais, non acollerá tanta información deste tipo como as outras redes sociais, dándolle máis prioridade aos avisos.