O Concello de Monforte renovou as pistas de tenis da Pinguela cun investimento de preto de 70.000 euros
O alcalde do Concello de Monforte, José Tomé Roca, anunciou a finalización das obras de reparación das pistas de tenis municipais. Estes traballos consistiron na mellora do sistema de drenaxe, a colocación dun novo pavimento e o pintado das liñas de xogo.
Segundo explicou o alcalde, “as obras afectaron unha superficie total de 1.296 m², requirindo unha renovación completa do firme debido ao deterioro provocado polo intenso uso destas instalacións. Procedeuse á recuperación do antigo sistema de drenaxe, para posteriormente instalar un novo pavimento de formigón poroso de 9 cm de espesor. Finalmente, pintáronse as liñas de xogo en cada unha das pistas, que teñen unhas dimensións de 36 x 18 metros.”
Ademais, tras a instalación do novo pavimento, levouse a cabo a renovación do peche perimetral das instalacións exteriores. Este traballo incluíu a substitución de 153 metros de muro existente para suxeitar o novo valado metálico, composto por malla galvanizada e plastificada S.T. 50/14 sobre unha estrutura tubular de 60 mm, xunto cos accesorios necesarios para a súa correcta instalación e tensado.
Sistema automatizado de reserva e acceso
Para completar a remodelación, instalouse un sistema automatizado de alugueiro e apertura, permitindo aos usuarios reservar as pistas de forma sinxela e cómoda. “A partir de agora, as persoas interesadas en alugar algunha das pistas de tenis municipais da Pinguela poderán facelo a través da plataforma de alugueiro de instalacións deportivas municipais SPORTTIA, que o Concello xa emprega para xestionar outras instalacións como o Campo Municipal de Fútbol Luis Bodegas”, sinalou o alcalde.
O único requisito é rexistrarse na plataforma cun usuario e contrasinal, xa sexa desde un ordenador ou descargando a aplicación móbil de SPORTTIA nun smartphone. Unha vez rexistrado, o usuario poderá escoller a franxa horaria desexada para alugar calquera das dúas pistas, dispoñibles de luns a domingo entre as 9:00 e as 23:00 horas. Tras completar a reserva, o interesado recibirá un código PIN numérico que deberá introducir no teclado instalado na porta de acceso ao recinto no horario reservado.
Horarios e tarifas
As pistas estarán dispoñibles para o seu alugueiro de luns a domingo, en horario de 9:00 a 23:00 horas. O custo por hora e pista é de 3,09 euros, que deberá aboarse no momento de realizar a reserva a través da pasarela de pago habilitada. Ademais, en función do horario, a iluminación do recinto activarase automaticamente cando sexa necesario.
Compromiso coa mellora de Monforte
O alcalde destacou a importancia desta actuación dentro do seu compromiso por transformar e mellorar o Concello de Monforte. “Ao longo destes anos de goberno demostramos o noso esforzo por modernizar a cidade. Un claro exemplo é a zona da Pinguela, que experimentou unha transformación moi positiva coa mellora das súas rúas, a creación do Parque Covas-Pinguela, a construción do novo pavillón de deportes e a renovación dos espazos de estacionamento e iluminación. Agora, coa reforma integral das pistas de tenis e a inminente finalización da remodelación da piscina municipal, consolidamos unha mellora substancial na calidade de vida desta zona.”