O Auditorio Municipal de Quiroga acolleu o espectáculo 'Grandes voces da canción'
O Auditorio Municipal de Quiroga acolleu o espectáculo Grandes voces da canción, unha proposta musical que tivo como protagonistas ao cantante Antonio Barros e á pianista e cantante iAlma, nun concerto que marcou o inicio da programación cultural do ano neste espazo. O público asistente puido gozar dunha viaxe sonora pensada como unha homenaxe ás voces inmortais da canción, nun formato acústico que destacou pola súa proximidade e elegancia.
Sobre o escenario, o dúo formado por Antonio Barros e iAlma ofreceu unha combinación na que a calidez vocal do cantante se fundiu coa delicadeza do piano, dando forma a un repertorio construído a partir de grandes éxitos de artistas emblemáticos como Nino Bravo, Camilo Sesto, Dyango, Raphael, Rocío Jurado ou Juan Pardo. O concerto converteuse así nun percorrido emocional por cancións recoñecidas polo público e profundamente arraigadas na memoria colectiva.
Antonio Barros é un dos artistas máis recoñecidos da música galega e conta cunha traxectoria profesional de máis de 15 anos, marcada pola súa versatilidade, polo seu talento e pola conexión constante co público. Os seus inicios nas orquestras galegas permitíronlle consolidarse como unha figura clave da verbena, aínda que a súa paixón pola música e a súa capacidade para innovar levárono a explorar novos formatos e escenarios máis aló do circuíto tradicional.
Este concerto formou parte do programa de concertos de Xacobe.gal impulsado pola Xunta de Galicia, unha iniciativa que aposta por achegar propostas musicais de calidade a diferentes puntos do territorio galego e por poñer en valor a creación artística en directo.