O alcalde e a Tenente de alcalde de Monforte participan na Asemblea da Red de Juderías en Segovia
O alcalde de Monforte de Lemos, José Tomé Roca, e a tenente de alcalde, Gloria Prada, participaron esta semana na 69ª Asemblea Xeral Ordinaria da Red de Juderías de España – Caminos de Sefarad, celebrada en Segovia.
A reunión tivo lugar no Antigo Salón de Plenos do Concello da cidade castelá e contou coa participación presencial e telemática dos representantes das 27 cidades que forman parte da rede. O encontro estivo presidido polo alcalde de Segovia, José Mazarías, actual presidente da entidade.
Durante a sesión aprobáronse as contas do exercicio 2025 e o orzamento para o ano 2026, que ascende a 311.000 euros. Así mesmo, ratificouse a incorporación de seis novas cidades, decisión xa adoptada na asemblea celebrada en decembro de 2025. Trátase de Sevilla, Calatayud, Cidade Autónoma de Melilla, Uncastillo, Llerena e Valencia de Alcántara, cuxos representantes expresaron o seu compromiso coa preservación e difusión do legado sefardí.
A incorporación destas novas localidades eleva a 27 o número de cidades integrantes da rede, que continúa a ampliar a súa presenza e a consolidar o seu proxecto de cooperación cultural.
Na asemblea tamén se abordou o desenvolvemento do Plan Estratéxico de Institucionalización e Potenciación da Rede, co obxectivo de reforzar o papel da entidade no contexto europeo e avanzar na súa consolidación como socio de referencia dentro dos Itinerarios Culturais Europeos vinculados ás European Routes of Jewish Heritage.
Entre as liñas de traballo figura tamén a aspiración a conseguir o Selo de Patrimonio Europeo para as cidades membros, así como o impulso dunha estratexia de proxección internacional que inclúe accións de promoción fóra do continente europeo, entre elas unha presentación institucional en Washington DC prevista para o 4 de setembro.
O alcalde de Monforte valorou positivamente os acordos adoptados e destacou a importancia do traballo conxunto entre as cidades. Neste sentido, sinalou a “importancia do consenso e da colaboración entre todas as entidades participantes, xa que é o camiño idóneo para definir unha estratexia de acción conxunta enfocada a protexer e difundir o patrimonio sefardí, un legado que forma parte do noso pasado e da nosa identidade cultural e que, polo tanto, temos o deber de conservar”.
Monforte de Lemos xa exerceu a presidencia da rede no ano 2023 e participou como cidade anfitrioa na 63ª Asemblea Xeral, celebrada no Palacio Condal do Parador de Turismo de San Vicente.