O alcalde de Monforte recibe ao novo xefe de tráfico
O alcalde de Monforte, José Tomé Roca, acompañado pola tenente de alcalde, Gloria Prada, recibiu este mércores no seu despacho da Casa do Concello ao novo Tenente Xefe do Destacamento de Tráfico da Garda Civil de Monforte de Lemos, Anxo Rodríguez Rodríguez, que tomou posesión do seu cargo recentemente.
Tomé deu a benvida á cidade e mantivo un primeiro contacto no que se fixo un repaso do estado actual da seguridade viaria no municipio de Monforte. “Neste primeiro encontro abordamos aspectos relacionados coa seguridade do tráfico e a necesidade de traballar conxuntamente para que Monforte siga sendo un municipio tranquilo en canto á seguridade viaria”, explicou o rexedor.
Así mesmo, ambos representantes expresaron a firme vontade de manter a colaboración entre os diferentes corpos de seguridade, neste caso Policía Local e Garda Civil.
O ourensán Anxo Rodríguez Rodríguez incorpórase ao seu novo cargo tras prestar servizo na Unidade de Seguridade Cidadá da Comandancia da Garda Civil de Ourense.