Monforte solidarízase coas vítimas do terrorismo
O Concello de Monforte convocou este mércores un minuto de silencio en recordo e solidariedade coas vítimas do terrorismo. Con este xesto, súmase á conmemoración do Día Europeo das Vítimas do Terrorismo, establecido pola Unión Europea o 11 de marzo, data na que se produciron os tráxicos atentados de Madrid en 2004.
O alcalde de Monforte, José Tomé Roca, a Tenente de Alcalde Gloria Prada, os concelleiros José Manuel Mougán e Regina López, así como outros membros da Corporación municipal e persoal do Concello, concentráronse esta mañá fronte á fachada do Concello, ás 12:00 horas, e gardaron un minuto de silencio en apoio e solidariedade coas persoas afectadas polo terrorismo e como mostra de rexeitamento e condena a todos os actos de barbarie.
Deste xeito, o Concello de Monforte súmase á proposta da Federación Española de Municipios e Provincias (FEMP) de lembrar ás vítimas do terrorismo nunha data que ten especial significado en España, polo doloroso recordo dos atentados de Madrid. En memoria de todas as vítimas e en solidariedade coas súas familias e seres queridos, celebrouse este minuto de silencio no Concello de Monforte.