Monforte reparará varias lousas soltas na rúa Santo Domingo a partir do luns
O alcalde de Monforte de Lemos, José Tomé Roca, informou das obras de reparación que se levarán a cabo na rúa Santo Domingo a partir da vindeira semana co obxectivo de mellorar o estado da calzada. A actuación céntrase no tramo comprendido entre a esquina do bar Km 0 e a Porta da Alcazaba, onde varias lousas de granito presentan movemento e precisan ser fixadas.
Segundo explicou o rexedor, os traballos consistirán na recolocación e suxeición dun total de dez lousas de pedra que actualmente están soltas, o que provoca pequenas irregularidades na superficie da rúa. A intervención comezará o luns 9 de marzo e prolongarase ata o mércores 11, cunha duración prevista de tres días.
As tarefas realizaranse en horario de 10.00 a 13.00 horas. Durante ese tempo será necesario cortar o tráfico de vehículos no tramo afectado para facilitar o traballo dos operarios e garantir a seguridade tanto do persoal como das persoas que transitan pola zona.
O alcalde sinalou que se decidiu realizar as obras nesta franxa horaria co fin de minimizar as molestias para o alumnado e as familias que acceden ao Colexio Fundación Educativa Torre de Lemos, situado nas inmediacións da Igrexa de Santa María da Regoa.
Mentres duren os traballos, o tráfico de subida cara a San Vicente deberá desviarse pola rúa Real. Pola súa parte, manterase aberta a circulación en sentido descendente desde o Campo da Virxe ata a Porta da Alcazaba para os vehículos que se dirixan ás rúas Falagueira, Zapateiras, Pescadeiras ou Cárcere Vella, ás que se poderá acceder a través da Porta. O itinerario alternativo estará debidamente sinalizado.