Monforte prepárase para a XXI Feira Medieval
A XXI edición da Feira Medieval de Monforte celebrarase os días 19 e 20 de abril de 2025, convertendo unha vez máis a cidade no epicentro da vida medieval en Galicia durante esa fin de semana. Así o destacou o alcalde, José Tomé, fai unhas semanas na presentación do programa oficial quen subliñou que esta cita “segue atraendo a milleiros de visitantes que veñen mergullarse no noso pasado medieval”.
Máis animación e maior participación
Entre as principais novidades desta edición está o incremento dos grupos de animación musical. En 2024 actuaban cinco grupos o sábado e catro o domingo; este ano serán sete grupos cada día, enchendo as rúas de música e ambiente festivo durante toda a fin de semana.
Tamén medra a repartición de fachos e faroliños, unha das actividades máis apreciadas polos asistentes ao ascenso nocturno a San Vicente. Este ano distribuiranse 325 fachos (fronte aos 200 do ano anterior) e 650 faroliños de papel (incrementando os 500 do 2024), todos no Campo da Virxe.
En canto ao Mercado Medieval, o número de postos tamén aumenta: pasarán de 135 a 140, distribuídos en 45 postos de gastronomía, 32 de comercio e 63 de artesanía, seleccionados entre 191 solicitudes presentadas en prazo. Este crecemento obrigará a ampliar o recinto da feira, incorporando a Praza de San Antonio para albergar os novos postos.
Espectáculos destacados
Entre as propostas máis destacadas desta edición atópase "O Gran Dragón", un impresionante espectáculo de rúa protagonizado por un dragón xigante, acompañado por músicos, bailaríns e malabaristas con lume. Terá lugar o sábado e domingo ás 20:00 horas, partindo da Praza de España.
O sábado, ás 21:30 na Praza Luis de Góngora, presentarase "LÚA", un espectáculo musical con Tamara Pérez, quen descenderá en grúa para ofrecer unha actuación máxica combinando música, danza e efectos visuais, previa á queima de fogos artificiais.
O domingo, ás 21:00 na Praza de San Antonio, será a quenda de "SUAREN BATAILA", un espectáculo que mestura malabares aéreos, dramatizacións e efectos de lume e pirotecnia.
Ademais, o sábado 19 destacarase o desfile "ERRANTES", con personaxes fantásticos inspirados na escuridade da Idade Media, e ás 20:45 terá lugar o concerto do grupo GRIMORIUM na Praza de España.
Actos centrais
O sábado 19 ás 12:00 horas, a apertura oficial da Feira contará cun espectáculo de pregoeiros na Praza de España, seguido do saúdo institucional do alcalde e dunha salva de artillería realizada cunha réplica dunha bombarda do século XIV.
Entre os eixos centrais do evento inclúense o Campamento Medieval na Praza de España, o Campamento Infantil xunto ao Convento das Nais Clarisas, espectáculos de aves de rapiña, cetrería, xustas e torneos medievais, animacións de rúa e espectáculos nocturnos nas prazas Luis de Góngora e San Antonio.
A tradicional entrega de premios dos concursos de traxes medievais, decoración de balcóns e establecementos terá lugar o domingo ás 19.00 horas na Praza de España.
Dende o Concello destacan a colaboración da Asociación de Artesáns de Monforte, encargada da montaxe do estrado na Praza de España e da decoración das rúas, incluíndo a emblemática Ponte Vella, a Torre da Homenaxe e os pendóns na Praza de San Antonio.