Monforte prepara os dispositivos de seguridade para a Semana Santa
O alcalde de Monforte, José Tomé Roca, presidiu este mércores a mesa de seguridade na que se planificaron os operativos especiais para os principais eventos da Semana Santa na cidade, entre eles a Procesión do Venres Santo, a XXII Feira Medieval e a Procesión do Martes de Pascua.
Na reunión participaron a Tenente Alcalde, Gloria Prada, e o Concelleiro de Medio Ambiente, Obras, Medio Rural e Servizos, José Luis Losada, xunto co inspector da Policía Local, o Xefe de Bombeiros e varios técnicos municipais. O obxectivo foi garantir que todas as celebracións se desenvolvan con seguridade, reforzando a presenza de efectivos de seguridade e de Protección Civil.
O programa de eventos comeza o venres 3 de abril, cando terá lugar a misa na Igrexa de Santa María da Antiga ás 19.00 horas, seguida da procesión, que se estima que durará arredor dunha hora. Durante este tempo, varias rúas estarán pechadas ao tráfico, incluíndo a Avenida de Galicia, Conde, Roberto Baamonde, Praza Ponte Fontecha, Cardenal, Compañía e Escultor Francisco Moure.
Durante a fin de semana da Feira Medieval, o 4 e 5 de abril, o centro histórico de Monforte acollerá a XXII edición do evento, con postos e actividades que se estenderán polo Conxunto Histórico. O operativo de seguridade contará con ambulancias, bombeiros e Protección Civil, ademais de vixiantes privados en distintos puntos da feira. Os baños públicos estarán instalados no atrio da Régoa, Campo de San Antonio e rúa Armando Cotarelo.
Finalmente, o martes 7 de abril, Martes de Pascua e festivo local, as actividades comezarán ás 10.00 horas na explanada diante do Concello e incluirán unha procesión ata a Igrexa de San Vicente, seguida dunha misa ás 11.00 horas. Entre as 10.00 e as 12.30 horas, o tráfico estará limitado nalgunhas rúas para permitir o correcto desenvolvemento da comitiva, con especial atención a persoas con mobilidade reducida.
O Concello insiste na importancia destes dispositivos para garantir a seguridade de participantes e visitantes e recomenda respectar a sinalización provisional e as indicacións dos efectivos durante os actos da Semana Santa.