José Tomé volve pedir á Xunta que declare a Feira Medieval de Monforte como Feira de Interese Turístico Galego
O alcalde de Monforte, José Tomé Roca, deu a coñecer este luns a campaña promocional da vixésimo primeira edición da Feira Medieval de Monforte, un evento que se celebrará os vindeiros 19 e 20 de abril de 2025.
En concreto, a campaña apoiarase en dous elementos fundamentais, como son o cartel e o vídeo oficiais, cuxos deseños foron presentados polo rexedor monfortino. Durante a rolda de prensa, o rexedor estivo acompañado pola primeira tenente de alcalde, Gloria Prada, e o concelleiro de Medio Ambiente, Medio Rural e Servizos.
Con estes dous elementos, o alcalde anunciou o desenvolvemento dunha campaña de promoción “igual de intensa que a que fixemos nos pasados anos, para que a xente poida incluír a Feira Medieval dentro da súa programación de descanso e de lecer nas vacacións de Semana Santa, campaña que se sustentará nos dous elementos antes mencionados”.
“Por fin chegamos aos 21 anos de Feira Medieval de maneira ininterrompida, e a pesar de non ter aínda comunicación de se será recoñecida como Feira de Interese Turístico Galego, o equipo de goberno mantén intactas as ilusións e a esperanza de que así sexa e de que pronto poidamos celebrar este recoñecemento tan merecido”, destacou o rexedor.
Neste sentido, José Tomé incidiu en que “é de xustiza que a Xunta de Galicia nos outorgue un recoñecemento, como Feira de Interese Turístico Galego, que cremos que xa hai anos nos tiña que ter recoñecido”, porque “a Feira Medieval de Monforte é un dos maiores eventos da nosa cidade a nivel cultural e comercial, é un dos eventos máis destacados do noso calendario anual, xa que representa un importante atractivo turístico e axuda a atraer miles de visitantes a Monforte e ao conxunto da Ribeira Sacra”.
Cartel oficial
O cartel da XXI edición da Feira Medieval “foi escollido entre diversos bosquexos, porque conxuga varios elementos que para nós son claramente centrais da nosa feira”, explicou o alcalde. “O ano pasado tomou protagonismo unha figura guerreira feminina que transmitía forza e valentía. Este ano, tamén buscamos unha imaxe que transmitise forza e sorpresa, ao mesmo tempo queriamos que aparecese algún elemento alusivo á música, que é esencial nos espectáculos de animación das rúas e, como resultado, temos unha imaxe moi potente que transmite a posibilidade de vivir unha experiencia distinta e única para todos os visitantes que se animen a gozar da Feira Medieval de Monforte. Por iso escollemos unha imaxe real da propia Feira do ano 2024 e adaptámola ao cartel, porque pensamos que a nosa Feira Medieval ten entidade suficiente para promocionarse por si mesma”.
Vídeo recopilatorio
O segundo elemento presentado polo alcalde foi o vídeo promocional para este ano 2025. “A nosa proposta audiovisual”, explicou o alcalde, “está configurada a través dunha música heroica, intensa e que vai in crescendo, acompañando e sendo o fío condutor desas imaxes que, a modo de recompilación, son tamén un resumo dos eventos máis destacados da Feira Medieval do ano pasado, do 2024”.
Deste xeito, o vídeo recolle os eixes centrais protagonistas da Feira, que nos permiten, tal e como destaca o vídeo, “un reencontro coa época medieval de Monforte de Lemos”: os espectáculos de cetraría, o mercado medieval con 140 postos este ano, o campamento medieval, as xustas e o gran torneo medieval, o campamento infantil, os espectáculos de luz e son no Palacio Condal ou na Praza do Campo de San Antonio, ou a solta de faroliños dende a Praza Luis de Góngora.
Este vídeo será proxectado no MUPI do Cardenal, no Mercado para a Medieval, e nas pantallas que se situarán durante a celebración da Feira en San Vicente e na Praza de España.
Unha versión máis reducida do vídeo, de algo máis de 2 minutos, será a que se difunda a través das redes sociais e da páxina web do Concello, para acadar a máxima difusión posible deste evento.
Promoción intensa da Feira Medieval
Na súa intervención, o alcalde tamén explicou que “con estes dous elementos que damos a coñecer hoxe, queremos facer unha campaña igual de intensa que a que fixemos nos pasados anos, para que a xente poida incluír a Feira Medieval dentro da súa programación de descanso e de lecer nas vacacións de Semana Santa, para que escollan vir a Monforte”.
A campaña de promoción da Feira incluirá tamén insercións publicitarias tanto nos medios locais como provinciais e autonómicos, en xornais e radios.
Por outra banda, realizarase un reparto do cartel en todos os establecementos comerciais da cidade, e tamén por toda a comarca e nas principais cidades de Galicia.
Ademais, como todos os anos, colocarase o cartel durante a Feira do Viño de Sober, por ser un dos eventos con maior afluencia de visitantes e, polo tanto, ter un potencial significativo para lograr unha maior difusión.
“Creo que o traballo de promoción que facemos ano a ano desta Feira é bo, e proba diso son as solicitudes rexistradas para a instalación de postos de venda de produtos, o que supón un número moi alto en relación con outros eventos doutras cidades”, resaltou o rexedor monfortino. “Esta alta demanda proba que a Feira Medieval de Monforte é un evento exitoso e consolidado, que é un referente dentro do calendario de eventos de Galicia, porque son moitos os artesáns e comerciantes que queren participar nela”.
Presentación do programa oficial durante o Mercado para a Medieval
O terceiro elemento de promoción da Feira Medieval será o Programa Oficial, que será dado a coñecer durante a inauguración do Mercado para a Medieval, en rolda de prensa que terá lugar o sábado 5 de abril ás 11:30 horas na Praza de Abastos, “mercado co que queremos animar as vendas relacionadas con produtos vinculados á Feira Medieval”.
Neste mercado, o visitante atopará unha gran variedade de postos dedicados á venda de traxes medievais confeccionados a man para adultos e nenos, bixutería, complementos, un salón de peiteado e maquillaxe, ideas para a decoración de establecementos de hostalaría… é dicir, todo o necesario para poder lucir o “máis medieval posible” nesta nova edición da Feira Medieval.
O alcalde concluíu a súa intervención destacando que “Monforte revive por 21ª ocasión o esplendor medieval do seu pasado”, unha cita imprescindible en Galicia, á que esperamos que, como nas últimas edicións, acudan miles de visitantes, e que contemos tamén coa colaboración e implicación dos nosos veciños, a nosa hostalaría e o noso comercio”.