IGV reclama un compromiso real por parte do Ministerio de Transportes coas estradas do interior de Lugo e Ourense
Interior Galego Vivo denunciou fai unhas semanas a través dunha carta dirixida Ministerio de Transportes “o pésimo estado da rede viaria estatal no interior galego”.
En concreto, a través dunha misiva asinada por Antom Fente Parada, Coordinador Xeral da formación, destacaban o “estado da N-540 entre Lugo e Ourense, que representa un serio perigo para a seguridade viaria”. De feito, lembraban, “son crecentes os contratempos na mecánica dos vehículos, o que repercute moi negativamente na veciñanza e supuña custos cada vez maiores entre a desesperación dos traballadores e traballadoras que, diariamente, teñan que usar esta estrada”.
“Somos coñecedores de que se dotara con fondos a reparación desta estrada pero, a día de hoxe, estes traballos son non só lentos, senón ineficaces e pouco duradeiros”, sinalaba Antom Fente. Dende Interior Galego Vivo advertían de que “o orzamento non era suficiente” e urxían a unha actuación e mellora integral do principal nexo de unión entre as cidades do interior galego.
Por outra parte, IGV denunciou tamén o “deplorable estado da N-120 entre Monforte de Lemos e Os Peares", especialmente nos tramos da vila do Cabe e arredores. Así, urxiron a que se adoptasen medidas con celeridade, que "debían ter en conta de igual modo o estado da N-120A en Os Peares, permanente quebradeiro de cabeza para a veciñanza desa poboación”.
Asemade, denunciaron que a N-525, de Benavente (Zamora) a Santiago de Compostela, precisa atención ao seu paso polas comarcas de Monterrei e A Limia, en Ourense, antes de que "o seu estado fose análogo ao calamitoso estado da N-540".
Interior Galego Vivo insistía na carta na “necesidade que tiña o interior galego de infraestruturas útiles e ben conservadas, ao tratarse de territorios periféricos con serios problemas de dispersión e demotanasia, que se vían aceleradas, precisamente, polo abandono institucional e a falta dunha atención análoga á que as institucións ofrecen a territorios de máis poboación”.
Resposta “insuficiente”
Segundo denuncian dende IGV, a resposta dada polo Ministerio de Transportes a este problema é “insuficiente”. En concreto, explican, dita resposta sinala os plans previstos en determinados puntos das estradas, que segundo Transportes, estarían “en fase de redacción de proxecto”, referíndose a varias actuacións na N-120, pero sen especificar a data prevista de execución.
Dende o Ministerio sinalan tamén que está en curso a rehabilitación da N-540 entre o km 0 e 69, obras que dende IGV supoñen que “e reanudarán esta primavera despois do parcheado chapuceiro que se fixo após enviarmos da nosa misiva ao Ministerio”. Porén, din, “cómpre lembrar que apenas 15% do previsto foi executado en 2024”.