Adxudícase a reforma do Parque dos Condes con nova fonte de 25 metros
O Concello de Monforte adxudicou de maneira definitiva á empresa Misturas SA o contrato para a reforma do Parque dos Condes, cun orzamento de 636.334,16 euros e un prazo de execución de catro meses desde a sinatura da acta de replanteo. A aprobación realizouse na Xunta de Goberno Local do luns 26 de xaneiro, tras valorar que, das dúas propostas presentadas, esta obtivo a mellor puntuación. O alcalde, José Tomé, destacou que “Monforte contará cunha fonte espectacular este mesmo verán, unha fonte de cidade que será un novo atractivo turístico e un orgullo para todos os monfortinos e monfortinas”.
O procedemento de contratación iniciouse en outubro coa licitación do contrato, cun orzamento base de 677.018,89 euros financiados mediante un convenio entre o Concello de Monforte e a Deputación de Lugo. A reforma abranguerá a área delimitada polo Cadrado, a Zona D e a rúa Cardenal, e incluirá a instalación dunha fonte circular de 25 metros de diámetro rodeada por un paseo de 5 metros de ancho. Segundo o alcalde, será “unha fonte de cidade, moderna e eficiente, que converterá o Parque dos Condes nun espazo de referencia do lecer urbano”.
A fonte situarase no centro do parque, entre a rúa Cardenal e o Cadrado, completando a urbanización da Zona D, actualmente en obras, e dotando á área dun aspecto singular e integrado coa trama urbana e paisaxística da Compañía e do entorno do Cardenal. Desde 2025, o goberno local recuperou fontes que estaban sen uso, como as das Casitas, a Estación ou a do Parque da Compañía, mentres que outras foron suprimidas. O alcalde subliñou que coa nova fonte preténdese “dotar a Monforte dunha fonte emblemática, que non pase desapercibida para residentes e visitantes”.
As obras cubrirán unha superficie de 2.850 metros cadrados que non recibía intervención desde hai anos, destacando a instalación da fonte circular no lugar do actual pequeno busto do Cardenal, que se trasladará ao centro da rotonda da nova rúa da Zona D. O paseo circundante terá 5 metros de ancho con pedra granítica, e a zona máis próxima ao Cadrado contará con formigón pulido de cor xabre. Os parterres e as árbores serán reubicados ou substituídos, e a iluminación adaptada á nova distribución. Ademais, instalaranse o dobre de bancos para maior comodidade da cidadanía.
O alcalde explicou que a fonte poderá ser contemplada desde a rúa Cardenal, revitalizando o espazo central do parque e converténdoo nun punto emblemático da cidade. A instalación contará con programación adaptable a diferentes horarios e shows especiais, control remoto e efectos de auga variados con iluminación RGBW DMX. “O deseño prioriza a eficiencia enerxética e a sustentabilidade, reutilizando a auga e optimizando o consumo eléctrico para un desenvolvemento urbano responsable”, engadiu José Tomé.