A Xanela do Maxín levará a Quiroga o seu espectáculo 'Dende Rosalía ata as Cantareiras'
Fiel á súa tradición de organizar actividades para conmemorar o Día das Letras Galegas, o BNG de Quiroga decidiu contar este ano coa compañía A Xanela do Maxín e apostar por unha proposta escénica divulgativa e entretida que fai un percorrido polas mulleres homenaxeadas nesta data tan sinalada.
Trátase dun espectáculo multidisciplinar de pequeno formato que combina narración oral, música, obxectos e novas tecnoloxías, poñendo en valor a herdanza das mulleres homenaxeadas nas Letras Galegas, con especial atención ás Cantareiras e ao cancioneiro popular, eixo central da celebración deste 2025.
- No espectáculo lembrarase a seguintes figuras da cultura galega:
- Rosalía de Castro: A Poetisa do Sentimento
- Francisca Herrera Garrido: Abrindo camiños
- María Mariño: A Escritora da Terra e do Mar
- María Victoria Moreno: A Narradora Incansable
- Xela Arias: A Poetisa da Palabra Libérrima
- Luísa Villalta: Entre Versos e Escenarios
- As Cantareiras: Alma e Tradición
Sobre esta proposta escénica, a compañía destaca: “Poñemos en valor o legado das excepcionais mulleres homenaxeadas nas nosas Letras, dende Rosalía de Castro ata as Cantareiras. Mulleres que deixaron unha pegada fonda na literatura, na música e no teatro galegos, e que destacaron pola súa creatividade, compromiso e contribución á nosa cultura”.
Desde o BNG de Quiroga animn a toda a veciñanza “a facer un oco na axenda e achegarse este venres á Casa da Cultura para pasar un intre agradable e lembrar xuntas a memoria das mulleres das nosas Letras Galegas”.