A Pobra do Brollón inaugura unha exposición con motivo do Ano Castelao
Con motivo do 75 cabodano de Castelao, o Concello da Pobra do Brollón acolle unha exposición e unha obra teatral que poñen en valor a obra dun dos intelectuais galegos máis influentes, grazas á colaboración coa área de Cultura da Vicepresidencia da Deputación de Lugo.
A exposición, titulada 'Sempre en Galiza. 1944-2024', ofrece unha mostra da obra cume de Castelao e do seu impacto no pensamento político e no nacionalismo galego. Trátase dunha serie de paneis con textos explicativos, fotografías e debuxos do autor que se poden visitar no salón de actos da Casa da Cultura Olga Novo. A exposición estará aberta ata o 29 de agosto, de luns a venres en horario de 10:30 a 13:30 horas, solicitando previamente a chave na Biblioteca municipal.
O sábado 30 de agosto, tamén na Casa da Cultura, representarase a obra teatral 'Cousas de Castelao', da compañía Os Quinquilláns. Segundo a programación, a peza é “unha divertida versión da colección de relatos Cousas que transita entre a traxedia, a comedia e a farsa e na que están presentes os grandes temas da obra orixinal: ecoloxía, solidariedade, emigración, xustiza social, etc.”.
O espectáculo inclúe unha visita teatralizada á exposición 'Sempre en Galiza' que comezará ás 20:30 horas. Tras un breve descanso no que o público poderá continuar a visitar a mostra, a obra teatral dará comezo ás 21:00 horas, cunha duración aproximada de 55 minutos.