A mostra ‘Coreografías do facer: imaxes do traballo feminino en Gustav Henningse’ xa pode visitarse en Chantada
A igrexa nova de Chantada acolle ata o 20 de abril a exposición "Coreografías do facer: imaxes do traballo feminino en Gustav Henningsen”. A mostra forma parte da programación que organiza o Concello de Chantada a través do CIM, Centro de Información á Muller arredor do 8M.
As imaxes da exposición son parte do extenso arquivo de fotografías realizadas polo folclorista e antropólogo, Gustav Henningsen, (Slagelse, Dinamarca, 1934) entre os anos 1965 e 1968. Nestes tres anos percorreu vilas e aldeas galegas coa súa muller, Marisa Rey (Madrid,1936), recompilando unha valiosa documentación fotográfica e oral na que as mulleres teñen un grande protagonismo.
A mostra que pode visitarse en Chantada céntrase na documentación fotográfica do antropólogo. A exposición forma parte do proxecto MICE Museo do Pobo Galego, e pode visitarse na igrexa nova de Chantada ata o 20 de abril, en horario de 10.00 a 13.00 horase 17.00 a 20.00 horas, de martes a domingo.
A programación para celebrar o 8M en Chantada rematará o día 23 de abril coa Xincana pola Igualdade na que participarán os colexios, Xoán de Requeixo e Eloísa Rivadulla.