A exposición 'O fin do Camiño' chega ao Saviñao
![miniatura mostra fin do camiño](https://ribeirasacraxa.com/wp-content/uploads/2021/03/miniatura-mostra-fin-do-camino.jpg)
O Círculo Saviñao, de Escairón, acolle a mostra itinerante 'O fin do Camiño', organizada polo colectivo Egeria, e que conta co patrocinio da Xunta de Galicia a través do programa 'O teu Xacobeo'.
As fotografías que se mostran son de Eduardo Ochoa e Carlos Puga, quenes "reflicten especiais visións dos Camiños a Compostela, arredándose das visións turísticas e centrándose nos aspectos humanos e monumentais, dos que se destacan os detalles máis sobranceiros". Ademais, cada un dos dez paneis dobres que compoñen a exposición contan con breves glosas á ruta xacobea de Urbano Lugrís, Dante, Frei Luis de León, Tirso, Machado ou Cunqueiro, entre outros.
Os textos están redactados en galego, castelán e inglés, e abordan o tema do 'fin do camiño' como expresión dos sentimentos que moven ao peregrino a emprender este camiño milenario.
A mostra, que se poderá visitar en Escairón ata o vindeiro luns 8 de marzo, chega á localidade no percorrido que durante este ano está a facer polos concellos polos que discorren os Camiños de Inverno, Primitivo, Norte e Vía Kunig. No ano 2019 a mesma exposición estivo nos concellos do Camiño Francés.
![presentacion saviñao mostra fin do camiño](https://ribeirasacraxa.com/wp-content/uploads/thumbs/2021/03/presentacion-savinao-mostra-fin-do-camino-200x104.jpg)