A Deputación de Lugo licita as obras de mellora na LU-P-5301 ao seu paso por Ribas de Sil
A Deputación de Lugo aprobou a licitación dun novo proxecto destinado a mellorar a mobilidade no municipio de Ribas de Sil, cun investimento de 144.762,83 euros na estrada LU-P-5301.
Segundo explicou o deputado de Promoción Económica e Social, Pablo Rivera Capón, a actuación permitirá acondicionar un tramo de case dous quilómetros desta vía, concretamente entre os puntos quilométricos 6,200 e 8,198. Trátase dun eixe clave que conecta o núcleo urbano de San Clodio con distintos miradoiros de montaña ata o Alto da Cruz.
Os traballos previstos inclúen a reapertura de cunetas, a pavimentación con aglomerado en quente e o repintado da sinalización viaria. Con esta intervención, a estrada quedará practicamente renovada na súa totalidade, xa que a Deputación xa executou anteriormente obras noutro tramo da mesma vía, entre os quilómetros 3,1 e 6,2.
O proxecto conta cun prazo de execución estimado de catro meses e enmárcase dentro da estratexia provincial de mellora da rede viaria para garantir a seguridade e a comunicación nos municipios.