Varios concellos da Ribeira Sacra abriron as portas das súas piscinas municipais esta fin de semana
Diversos concellos do sur de Lugo abriron esta fin de semana as súas piscinas municipais ao comezar oficialmente o verán coa chegada do calor e do mes de xullo.
Así, no caso do Concello de Quiroga, as piscinas abrirán todos os días desde as 12.00 ata ás 08.00 así como o servizo de cafetería, que estará dispoñible no mesmo horario que estas instalacións municipais. Deste forma, preténdese dar comezo á tempada estival no municipio dando a benvida ás actividades ao aire libre propias desta época do ano e poder gozar do verán e practicar deporte nas instalacións.
Pola súa parte, a piscina municipal de Chantada tamén abriu as súas portas, que pecharán o vindeiro 3 de setembro. Así, o horario será de 12.00 a 14.00 horas e de 15.00 a 20.30 horas de luns a venres, e de 12.00 a 20.00 horas durante os fins de semanas. O 28 e 29 de agosto permanecerán pechadas debido ás festas patronais de Chantada.
O Concello de Pantón tamén abriu as súas piscinas municipais esta fin de semana, que se manterán ata setembro e que abrirán en horario ininterrompido de 13.00 a 21.00 horas.
Máis piscinas nos concellos do sur de Lugo
Da mesma maneira, o Concello de Carballedo e o Concello de Taboada adiantáronse aos demais e abriron as portas das súas piscinas municipais o 30 de xuño, venres. No caso de Carballedo, a piscina abrirá todos os días de 16.00 a 21.00 horas. Mentres, en Taboada abrirá nese horario de luns a venres, pero as fins de semana e festivos, abrirá de 12.30 a 21.00 horas.
Por último, no Concello de Sober tamén deron a benvida a tempada de verán coa apertura este sábado da piscina municipal, que abrirá de 15.00 a 21.00 horas todos os días. Ademais da entrada para calquera veciño a pasar a tarde, nas piscinas municipais terán lugar os cursos de iniciación ou perfeccionamento para nenos e nenas a partir de 4 anos os martes e xoves.