Un estudo impulsado pola Deputación de Ourense e a UVigo advirte do impacto negativo para a provincia da supresión do AVE na Gudiña
A Deputación de Ourense, a través do Inorde, presentou os resultados preliminares dun estudo elaborado pola Universidade de Vigo que analiza o impacto da eliminación de paradas na estación da Gudiña do servizo de alta velocidade. O informe evidencia un deterioro estrutural na mobilidade, a economía e a cohesión social nas comarcas do oriente ourensán.
Segundo o estudo, o recorte de frecuencias non é simplemente un axuste técnico, senón un factor que debilita o territorio con efectos directos na economía familiar e empresarial, no acceso a servizos básicos e nas expectativas de desenvolvemento en zonas como Viana–A Gudiña, Valdeorras, Verín e Terras de Trives.
Os datos amosan que preto do 70 % das persoas enquisadas véndense afectadas nos seus desprazamentos persoais e case un 40 % sinala impactos nos seus traxectos laborais, confirmando que o AVE formaba parte da mobilidade diaria da poboación. A eliminación das paradas nas primeiras horas da mañá e últimas da tarde é especialmente prexudicial, xa que imposibilita viaxes de ida e volta no mesmo día a destinos clave como Madrid ou o eixo atlántico galego.
Desde o punto de vista económico, máis do 90 % dos participantes valoran o impacto como alto ou moi alto, destacando o aumento de custos, a perda de eficiencia e a redución da competitividade para sectores estratéxicos como o turismo, a hostalaría, o comercio e o transporte.
Ademais, o informe reflicte un sentimento xeneralizado de agravio, xa que un 76,1 % considera que existe unha discrepancia entre o investimento público en infraestruturas e o servizo efectivamente prestado. Así mesmo, un 86,9 % alerta sobre o aumento da desigualdade no acceso a servizos e oportunidades en comparación con outros territorios mellor conectados.
O estudo tamén pon de manifesto dificultades crecentes no acceso a servizos sanitarios, educativos e administrativos, ademais dunha maior sensación de illamento territorial e preocupación polo risco de despoboamento.
En canto ás solucións, a poboación e o tecido empresarial rexeitan as medidas “compensatorias” como lanzadeiras ou incentivos alternativos, e case o 90 % considera que a única opción eficaz é a restitución das frecuencias eliminadas. En concreto, o 94,3 % pide recuperar o tren de primeira hora cara a Madrid, e un 79 % reclama a recuperación da frecuencia matinal cara a Ourense e o resto de Galicia.
A Deputación reafirma o seu compromiso cunha conectividade ferroviaria xusta que garanta igualdade de oportunidades e cohesión territorial, apoiándose en datos obxectivos para esixir ás administracións a restitución dun servizo adecuado ás necesidades reais do territorio. En outubro pasado, o pleno provincial aprobou unha moción na que reprochaba as decisións do Ministerio de Transportes que reduciron as frecuencias semanais na Gudiña, eliminando precisamente os horarios máis útiles para a comarca, e reclamaba a recuperación inmediata dos horarios anteriores e a mellora das infraestruturas.