Trinta candidaturas optan aos Premios do Deporte 2025 en Monforte de Lemos
Un total de 30 candidaturas foron presentadas para participar na nova edición do Concurso de Premios do Deporte 2025, convocado polo Concello de Monforte de Lemos. O certame busca recoñecer e poñer en valor o traballo realizado por deportistas, adestradores/as, árbitros/as e clubs ao longo do presente ano.
Segundo destaca o alcalde de Monforte, José Tomé Roca, a iniciativa pretende visibilizar o esforzo e a dedicación das persoas vinculadas ao deporte local, que con frecuencia acadan importantes resultados en competicións a nivel autonómico, nacional e mesmo internacional.
Unha vez formalizadas todas as candidaturas, o seguinte paso será a selección das persoas e entidades gañadoras en cada categoría. Esta tarefa recaerá nun xurado composto por seis membros, entre os que figuran representantes municipais e persoas vencelladas ao deporte a nivel local, provincial e autonómico. O órgano estará presidido polo alcalde de Monforte, José Tomé Roca, e contará tamén coa participación do concelleiro de Deportes, José Manuel Mougán.
Os nomes das persoas e clubs galardoados daranse a coñecer na Gala do Deporte 2025, cuxa data de celebración está aínda por concretar.