Suspéndense as rutas en catamarán polo río Miño ata fin de tempada
As tarefas de mantemento de Naturgy no encoro dos Peares obrigan a suspender desde este mércores as rutas en catamarán polo río Miño. Así llo comunicou a empresa, que é titular dunha concesión para o aproveitamento de auga no río Miño con destino á produción de enerxía eléctrica, á Deputación.
A compañía ten previsto realizar nos próximos días un descenso do nivel do encoro dos Peares para realizar o mantemento das comportas da presa. Esta acción imposibilita a navegación con seguridade das rutas fluviais da Deputación polo Miño, que parten de Belesar (O Saviñao), polo que a institución provincial vese na obriga de suspender este servizo ata fin de temporada.
A institución provincial porase en contacto coas persoas que xa fixeran a súa reserva para gozar desta ruta polo Miño, informándoas da situación e facilitándolles a opción da devolución do importe do billete ou a posibilidade de realizar a ruta polo Sil, dende Monforte de Lemos, que se manterá operativa ata finais de ano.
A ruta polo Sil funcionará ata decembro
No caso da ruta polo Sil, esta semana mantéñense as viaxes de mércores a domingo. Despois organizaranse rutas o día de Todos os Santos, o 1 de novembro, con dúas viaxes pola mañá e dúas pola tarde.
O resto do mes de novembro só haberá percorridos durante as fins de semana e, en decembro, desenvolveranse dende o 2 ao 10 de decembro todos os días, con motivo da Ponte da Constitución. Para información e reservas, as persoas interesadas poden dirixirse á web ou chamar ao 982 260 196 en horario de 9.00 a 20.00 horas de luns a domingo.