Ribas de Sil ten este luns unha cita solidaria co teatro
Ribas de Sil acolle este luns 8 de decembro unha das citas máis esperadas das súas Tardes Teatrais. O grupo de teatro de Ribas de Sil, o máis veterano e seguido polo público local, volverá subir ao escenario do salón de actos para presentar dúas novas pezas de humor, ‘Morreu a tía María’ e ‘Non casei con todos’.
A proposta, que busca poñer en valor o talento escénico da veciñanza, ofrece unha oportunidade para desfrutar dun espectáculo pensado para todos os públicos e para fortalecer a participación cultural do municipio.
A entrada será, como é habitual, de balde e libre ata completar o aforo. Nesta ocasión, ademais, o evento incorporará unha vertente solidaria: instalarase unha mesa de doazón voluntaria en favor da Asociación Española Contra o Cancro (AECC), entidade recoñecida polo seu labor de apoio ás persoas afectadas pola enfermidade, ás súas familias e pola promoción da investigación científica.