Ribas de Sil organiza unha visita guiada gratuíta ao Pazo de La Cuesta
O Concello de Ribas de Sil organiza o xoves 14 de agosto de 2025, ás 11:00 horas, unha visita guiada gratuíta ao Pazo de La Cuesta, grazas á colaboración dos seus propietarios.
As entradas poderán retirarse nas oficinas do Concello entre o martes 5 de agosto, a partir das 9:00 horas, e o venres 8, ata as 15:00 horas. Neste primeiro prazo, só poderán inscribirse persoas que non participaron na visita de 2024, para facilitar que novos asistentes poidan desfrutar da experiencia. Cada persoa poderá retirar un máximo de catro entradas, indicando os datos das persoas usuarias. Dende o Concello sinalan que en caso de quedar prazas dispoñibles, abrirase un segundo período de recollida do 11 ao 13 de agosto, aberto a todo o público, sen restricións por participación en anos anteriores.
A actividade busca achegar ao público este espazo histórico e patrimonial de especial valor. Por iso, dende o Concello animan á veciñanza e visitantes a aproveitar esta oportunidade para coñecer de primeira man un dos elementos máis singulares do patrimonio local.