Retómanse as andainas saudables no Centro de Saúde de Chandrexa de Queixa
Este martes, 10 de xuño o persoal do Centro de Saúde de Chandrexa de Queixa retoma as súas andainas saudables. Nesta ocasión coa Ruta Circular San Cristovo, que se realizará ás 17.00 horas e á que están convidados os veciños e veciñas de todas as idades.
Esta actividade forma parte do proxecto gañador da IV Bolsa de Medicina Rural da Asociación de Médicos Galegos (Asomega) e da Sociedade Española de Medicina Xeral (SEMG): “Plan de Actuación Integral Saúde Natural do Macizo Central: Manzaneda-Chandrexa de Queixa”, que desenvolven de xeito coral persoal médico, de enfermería e nutrición dos Centros de Saúde de Manzaneda e Chandrexa de Queixa, xunto a profesionais destes concellos; o Centro de Educación Infantil e Primaria de Manzaneda; as Casas do Neno de ambos municipios; asociacións de mulleres rurais locais e o titular da farmacia de Manzaneda.