Rematan os campamentos de verán de Quiroga con máis de cen participantes
Os Campamentos de Verán 2025 do Concello de Quiroga chegaron hoxe ao seu fin tras dous meses de intensa actividade nos que participaron 110 nenos e nenas.
A iniciativa, organizada pola área de Igualdade do Concello dentro do programa “Concilia Quiroga” e cofinanciada polo Plan Corresponsables da Xunta de Galicia, ofreceu un completo programa de obradoiros, excursións e visitas culturais pola vila, incluíndo percorridos polos museos locais e polos murais que decoran as súas rúas.
O campamento desenvolveuse baixo a supervisión dun equipo de voluntariado e dunha coordinadora, que se encargaron do coidado dos rapaces e de organizar as diferentes propostas.
Porén, durante as dúas últimas semanas, a programación viuse condicionada polos incendios forestais que afectaron á comarca, xa que a mala calidade do aire obrigou a suspender as actividades ao aire libre e o uso das piscinas, o que levou aos monitores a buscar alternativas creativas para manter a diversión e a aprendizaxe.
A xornada de clausura tivo lugar esta mañá no patio do CEIP de Quiroga cunha gran festa de despedida, na que houbo xogos, pintacaras, trenzas, pompas de xabón e un almorzo con bocadillos e lambetadas. Ao acto acudiron tamén os responsables municipais, que acompañaron aos máis pequenos na recta final desta experiencia estival.