“Quiroga, terra de acollida” foi o tema escollido no faladoiro deste mes
O Concello de Quiroga celebrou este mes unha nova edición do Faladoiro, o encontro impulsado pola Concellería de Servizos Sociais e Participación Cidadá para favorecer a socialización e o intercambio de experiencias entre a veciñanza. Nesta ocasión, o tema foi “Quiroga, terra de acollida” e os protagonistas foron Laura e Jeyco, impulsores do proxecto Terriña Salvaxe.
A parella, procedente de Valencia, relatou neste encontro o camiño que os levou a instalarse no rural galego. A súa idea inicial non pasaba por vivir en Quiroga, pero tras coñecer o territorio a través das redes sociais decidiron establecerse en Outeiro. Chegaron por primeira vez en outubro de 2023 e asumiron a xestión dun local que funcionaba como cantina e aloxamento rural, ao que deron o nome de Terriña Salvaxe.
Porén, en setembro de 2024 un incendio destruíu o establecemento, un suceso que supuxo un duro golpe pero que tamén lles permitiu comprobar a solidariedade dos veciños e veciñas. Tras un tempo en Valencia para recuperar forzas, decidiron regresar e comezaron a buscar un novo espazo no municipio. Finalmente atoparon un local en San Xulián de Abaixo, o antigo restaurante Escaleira, onde se instalaron de novo en febreiro de 2025. Desde abril, Terriña Salvaxe reabriu ofrecendo unha proposta gastronómica que combina tradición e creatividade.
O encontro, moderado polo concelleiro responsable da iniciativa, desenvolveuse nun formato participativo no que o público puido facer preguntas e compartir vivencias propias, mantendo así o espírito do Faladoiro como un espazo aberto ao diálogo e á convivencia cidadá.