Quiroga substitúe as palmeiras da zona das Barrancas por magnolias con axuda do alumnado de secundaria
Os operarios do GES de Quiroga e da área de xardinería comezaron a plantar este mércores as novas magnolias que substituirán ás palmeiras da zona das Barrancas, un traballo no que participou o alumnado de secundaria do IES de Quiroga. Os alumnos aproveitaron tamén a saída para achegarse ata o paseo fluvial do Río Quiroga, onde recolleron lixo das súas beiras.
Dende o Concello lembran que fai seis meses foi preciso quitar as palmeiras da entrada de Quiroga, por estar atacadas polo “picudo vermello”. Agora, a zona contará cun novo arborado que lle devolverá a súa característica decoración.
Ata a zona das Barrancas, que lucirá a partir de agora un novo aspecto con estas árbores que non perden a folla e que florecen dende maio ata xuño desprendendo un agradable olor, desprazáronse o Concelleiro de Medio Ambiente e Medio Rural, Luis Manuel Arias e o Alcalde de Quiroga, José Luis Rivera.