Quiroga será o epicentro do parapente en Galicia cunhas xornadas formativas para pilotos
Os vindeiros 5 e 6 de abril, a localidade de Quiroga converterase no epicentro do parapente en Galicia cunhas xornadas formativas destinadas a pilotos desta modalidade. O evento, organizado polo Club de Parapente Quiroga en colaboración coa Federación Aeronáutica Galega e o Concello de Quiroga, terá lugar na Casa da Cultura en horario de 10.30 a 13.45 horas.
Baixo o título "Aerodinámica, seguridade e pilotaxe", a formación será impartida por Marcos Gay, CEO de Galicia Parapente, técnico deportivo e experimentado piloto. Ao longo das sesións, abordaranse aspectos clave como a seguridade en voo e a correcta pilotaxe, fundamentais para practicar este deporte con garantías.
A seguridade no parapente, como noutros deportes de natureza, baséase en tres piares esenciais: unha formación axeitada, o uso do equipamento adecuado e condicións meteorolóxicas favorables. O Val de Quiroga, polas súas características, ofrece con frecuencia as condicións idóneas para esta práctica. Ademais, os avances tecnolóxicos nos materiais e a mellora na formación dos pilotos contribuíron a aumentar significativamente os niveis de seguridade nesta disciplina.
As xornadas tamén servirán como punto de encontro o sábado, permitindo que persoas alleas ao mundo do parapente se acheguen a coñecer máis sobre esta modalidade. Os membros do Club de Parapente Quiroga estarán dispoñibles para informar sobre como iniciarse neste deporte ou simplemente compartir a súa paixón co público interesado en experimentar de preto o soño de voar.