Quiroga puxo fin este mércores ás actividades polo 25N cun “Círculo de Benestar”
Quiroga puxo fin este mércores ás actividades organizadas desde a Área de Igualdade e o Centro de Información á Muller do Concello, en conmemoración do 25 de novembro, Día Internacional para a Eliminación da Violencia contra a Muller.
A Casa da Cultura acolleu un “Círculo de Benestar” impartido pola educadora social Paula Santos, no que participaron numerosas veciñas, entre elas a concelleira de Igualdade e Benestar, Maite Pérez.
A programación comezou o pasado martes 18 de novembro cunha charla a cargo de Laura Macía sobre a independencia económica feminina, resaltando a importancia de que as mulleres sexan donas da súa propia economía. O 21 de novembro realizouse un obradoiro titulado “Así tratamos ben, así non tratamos a ninguén”, dirixido ao alumnado do Colexio de Infantil e Primaria de Quiroga, co obxectivo de fomentar o respecto desde idades temperás.
O acto central celebrouse o propio 25 de novembro, diante da Casa Consistorial, onde tivo lugar unha concentración coa lectura dun manifesto, ademais da entrega de material relacionado coa loita contra a violencia machista.