Quiroga mantén aberto ata o 2 de decembro o prazo para solicitar as axudas a estudantes
O Concello de Quiroga mantén aberto ata o 2 de decembro o prazo para solicitar as axudas destinadas a estudantes menores de 25 anos, dependentes economicamente, que cursen estudos superiores fóra do termo municipal durante o curso 2025/2026.
Para acceder ás axudas é necesario estar empadroado en Quiroga e cumprir a condición de dependencia económica. Consideraranse dependentes aqueles menores de 25 anos que convivan no domicilio familiar a 31 de decembro do ano anterior ao inicio do curso e que non conten cun contrato de traballo nin percibiran ingresos —agás bolsas— durante o ano 2025.
A presentación das solicitudes deberá facerse de maneira telemática mediante o impreso dispoñible na sede electrónica do Concello ou no Boletín Oficial da Provincia do 4 de novembro. Xunto ao formulario será preciso achegar unha copia do DNI e o certificado de matrícula ou o resgardo de pagamento emitido polo centro educativo.
Entre os gastos subvencionables inclúense a matrícula académica, a compra de libros de texto, o alugueiro de vivenda ou os gastos de transporte, sempre que os recibos e facturas estean a nome do estudante solicitante. A contía final que percibirá cada beneficiario dependerá do número total de solicitudes e dos xustificantes presentados, ata esgotar o crédito global de 8.000 euros previsto na convocatoria.
Unha vez pechado o prazo, o Concello notificará ás persoas solicitantes a resolución e, no caso de obter a axuda, deberán presentar as facturas que acrediten os gastos incluídos na petición.